सोलापूर : प्रथम वर्ष पदवी अभियांत्रिकी प्रवेशाच्या पहिल्या फेरीतील जागावाटप तंत्रशिक्षण संचालनालयाच्या वेबसाइटवर २८ जून रोजी प्रसिद्ध झाले आहे. पहिल्या फेरीतील जागांच्या वाटपानुसार विद्यार्थ्यांनी जागा स्वीकारण्यासाठी प्रवेश स्वीकृती केंद्रावर (गव्हर्न्मेंट पॉलिटेक्निक, सोलापूर) जाऊन प्रवेशाबाबतची कागदपत्रे व आवश्यक शुल्क ‘डीडी’द्वारे भरून आपला प्रवेश स्वीकृत करण्यासाठी संचालनालयाने चार जुलै रोजी दुपारीतीन वाजेपर्यंत मुदतवाढ दिलेली आहे. आवश्यक शुल्क पाच हजार रुपये (खुला प्रवर्ग व इतर मागासवर्ग, व्हीजेएनटी, एसबीसी) व एक हजार रुपये (एससी व एसटी प्रवर्गासाठी) आहे.
काही विद्यार्थी स्वीकृती केंद्रावर जाऊन कागदपत्रांची पडताळणी न करता केवळ ‘ऑनलाइन पेमेंट’ करून परस्पर निघून जातात, असे निदर्शनास आले आहे. तरी सर्व विद्यार्थ्यांनी आपला प्रवेश स्वीकृती केंद्राकडून खात्री करून पोचपावती घ्यावी, असे आवाहन एन. के. ऑर्किड अभियांत्रिकी महाविद्यालयाचे प्राचार्य डॉ. जे. बी. दफेदार यांनी केले आहे.
